Türkmenistanyň
Bilim ministrligi
Turkmenistan dunyanin ondebaryjy dowletleri we halkara guramalary bilen bilim ulgamynda netijeli gatnasyklary osduryar.
Täzelik
Türkmenistanyň Oguz han adyndaky Inžener-tehnologiýalar uniwersitetiniñ mugallymlary, ýagny biotehnologiýa kafedrasynyñ müdiri O.Soltanowa we molekulýar biologiýa we genetika kafedrasynyñ müdiri D.Porrykow Belarusyň Milli ylymlar akademiýasy tarapyndan 5 – 6-njy sentýabrda geçirilen «Ylym festiwaly – 2026» çäresine gatnaşmak üçin Belarus Respublikasynyñ Minsk şäherinde iş saparynda boldylar. Sekizinji gezek geçirilýän «Ylym festiwaly» Belarusdaky iň uly meşhur ylmy çäreleriň biri bolup, ýyllaryň dowamynda Minsk şäheriniň ýaşaýjylaryny we myhmanlaryny iň soňky ylmy ösüşler bilen tanyşdyrýan hem-de olara ylym we tehnologiýa dünýäsinden täze bilimleri öwrenmäge ýardam berýär. Festiwalyñ dowamynda Belarusyň Milli ylymlar akademiýasynyñ ähli ylmy-barlag institutlary we merkezleri özleriniñ innowasion işlerini görkezdiler. Türkmenistanyň Oguz han adyndaky Inžener-tehnologiýalar uniwersitetiniñ wekilleri hem biotehnologiýa ugryndan işlenip taýýarlanan taslamalary bilen çykyş etdiler. Olaryñ taýýarlan ylmy çözgütleri festiwala gatnaşyjylarda uly gyzyklanma döretdi. Olar Belarusyň dürli ylmy-barlag institutlaryndan gelen professorlar we ylmy işgärler bilen genetika we seleksiýa, mikrobiologiýa, iýmit we oba hojalyk biotehnologiýasy ugurlarynda alyp barýan ylmy işleri boýunça özara pikir alyşdylar.
Täzelik
Şu ýylyň 26-njy awgustyndan 8-nji sentýabry aralygynda Hytaý Halk Respublikasynyň Şenýan mugallymçylyk uniwersitetiniň binýadynda döwlet bilim edaralary üçin halkara okuw maslahaty dowam edýär. Şu günlerde ýurdumyzyň bilim ulgamynyň wekilleri hem foruma gatnaşmak maksady bilen, dostlukly döwletde iş saparynda bolýarlar. Okuw maslahatyna gatnaşyjylar Hytaýyň bilim ulgamyny dolandyrmak, özgertmek we sanlylaşdyrmak boýunça häzirki zaman tejribesini içgin öwrenmäge mümkinçilik tapdylar. Onuň maksatnamasy ýokary okuw mekdepleriniň dolandyryş ulgamyny döwrebaplaşdyrmak, ynsanperwer gatnaşyklary pugtalandyrmak, şeýle hem «akylly» bilim şäherçelerini döretmek ýaly döwrebap ugurlary öz içine alýar. Liaoning welaýatynyň bilim edaralaryna amala aşyrylan tejribe sapary nazary taýdan öwrenilenleri has-da berkitmäge ýardam berdi. Hususan-da, okuw maslahatyna gatnaşyjylarda bu ýerde eksperimental mekdebiň tehnologiýa, innowasiýa, psihologik goldaw we olimpiada taýýarlygy merkezleriniň işi bilen tanyşlyk aýratyn täsir galdyrdy. Hytaýyň öňdebaryjy uniwersitetleriniň professor-mugallymlarynyň çykyşlary-da özara tejribe alyşmakda örän netijeli häsiýete eýe bolýar. Çäräniň çäklerinde wekiliýet agzalary Sýamen uniwersitetinde we Şençžen şäheriniň innowasiýa merkezinde ylym, bilim we senagat boýunça özara hyzmatdaşlygyň gurallaryny, tehnologik startaplary goldamagyň usullaryny özleşdirýärler. Ýurdumyzyň bilim işgärleri şeýle halkara meýdançalarda işjeň çykyş etmek bilen, Gahryman Arkadagymyzyň hem-de Arkadagly Gahryman Serdarymyzyň milli hünärmenleriň daşary ýurt tejribesini ykjam özleşdirmegi boýunça öňde goýan wezipelerini durmuşa geçirmek ugrunda yhlasly zähmet çekýärler. (Ýörite habarçymyz)
Täzelik
2026-njy ýylyň 31-nji awgusty — 2-nji sentýabry aralygynda Gruziýanyň Bilim, ylym we ýaşlaryň işleri boýunça ministri Giwi Mikanadzeniň ýolbaşçylygyndaky wekiliýet ýurdumyzda saparda boldy. Dostlukly döwletiň wekiliýeti türkmen topragynda mähirli garşylandy. Mälim bolşy ýaly, ýurdumyzda giňden bellenilen Bilimler we talyp ýaşlar gününde hormatly Prezidentimiz Serdar Berdimuhamedowyň gatnaşmagynda Türkmen döwlet binagärlik-gurluşyk institutynyň täze binalar toplumy açylyp ulanmaga berildi. Bu döwrebap ýokary okuw mekdebiniň açylyş dabarasyna Gruziýanyň wekiliýetiniň hem gatnaşmagy aýratyn bellärliklidir. Bu ýerde talyp ýaşlar, professor-mugallymlar, hünärmenler üçin zerur bolan ähli amatlyklaryň döredilmegi daşary ýurtly myhmanlaryň ýokary bahasyna mynasyp boldy. Institutyň täze binalar toplumyndaky baş bina, mejlisler zaly, okuw binalary, müň orunlyk naharhana, kitaphana, ähli amatlyklary bolan umumy ýaşaýyş jaýlary, sport meýdançalary we beýleki tehniki desgalar, şeýle hem döwrebap enjamlar bilen tanyşlyk myhmanlarda ýakymly täsirleri galdyrdy. Bu ýokary okuw mekdebinde guralan duşuşyklar bolsa özara tejribe alyşmak üçin möhüm platforma bolup hyzmat etdi. Wekiliýet agzalary şeýle giň möçberli dabara gatnaşmagyň möhüm ähmiýetlidigini belläp, döwrebap bilimi, sanly tehnologiýalary hem-de halkara hyzmatdaşlygy ösdürmäge berýän uly ünsi üçin hormatly Prezidentimize hoşallygyny beýan etdiler. Dostlukly döwletiň wekiliýet agzalarynyň ýurdumyzyň ylym-bilim, saglygy goraýyş, sport ulgamlaryna gözegçilik edýän wise-premýer bilen duşuşmagy medeni-ynsanperwer çygyrdaky türkmen-gruzin gatnaşyklarynyň giň mümkinçiliklerini ara alyp maslahatlaşmakda aýratyn ähmiýetli boldy. Şunda özara bilim maksatnamalaryny işläp düzmek, bilelikdäki ylmy gözlegleri alyp barmak we ylmy gollanmalary taýýarlamak, talyplaryňdyr mugallymlaryň özara alyş-çalşygyny üpjün etmek meseleleri ara alnyp maslahatlaşyldy. Mundan başga-da, Magtymguly adyndaky Türkmen döwlet uniwersitetiniň hem-de Ýagşygeldi Kakaýew adyndaky Halkara nebit we gaz uniwersitetiniň ýolbaşçylarydyr professor-mugallymlary bilen duşuşyklar guralyp, olarda ikitaraplaýyn hyzmatdaşlygyň giň ugurlary dogrusynda pikir alşyldy. Şunda Gruziýanyň degişli ýokary okuw mekdepleri bilen özara bähbitli hyzmatdaşlygy ýola goýmagyň, ylym-bilim ulgamynda türkmen-gruzin gatnaşyklaryny gyzyklanma bildirilýän giň ugurlarda ösdürmegiň, netijede ylmy diplomatiýany has-da ilerletmegiň wajyp ähmiýetine üns çekildi. Gruziýaly myhmanlar üçin ýörite medeni maksatnama hem taýýarlanylyp, saparyň çäklerinde paýtagtymyzdaky «Magtymguly Pyragy» medeni-seýilgäh toplumynda ýerleşýän gruzin şahyry Şota Rustawelliniň heýkeline gül goýmak dabarasy boldy. Munuň özi edebi gatnaşyklaryň taryhy kökleriniň umumydygynyň, halklarymyzda döredijilige, edebiýata ýokary sarpa goýulýandygynyň aýdyň beýany boldy. Saparyň dowamynda Türkmen halysynyň milli muzeýine gezelenç guralyp, myhmanlar medeni mirasymyzyň gymmatlyklary bilen ýakyndan tanyşdylar. Halkymyzyň milli buýsanjy hem-de dünýäde giňden meşhur bolan nepis halylarymyz dostlukly döwletiň wekiliýet agzalarynda uly gyzyklanma döretdi. Gruziýanyň wekiliýeti Garaşsyz, hemişelik Bitarap Watanymyzyň halkara başlangyçlaryna uly ornuň degişlidigini buýsanç bilen nygtap, «Dialog — parahatçylygyň kepili» filosofik ýörelgesi esasynda hoşniýetli gatnaşyklary işjeňleşdirýän, halkara hyzmatdaşlygyň netijeli ösdürilmegi üçin giň mümkinçilikleri döredýän türkmen halkynyň Milli Lideri Gahryman Arkdagymyza hem-de hormatly Prezidentimize tüýs ýürekden sagbolsunlaryny beýan etdiler. Ylýas ŞYHYÝEW, Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 2-nji ýyl talyby.