Berkarar döwletiň täze eýýamynyň Galkynyşy döwründe mukaddes Garaşsyzlygymyzyň şanly 35 ýyllygynyň dabaralaryna beslenýän «Garaşsyz, baky Bitarap Türkmenistan — bedew batly at-myradyň mekany» ýylynda ýurdumyz taryhy ösüşleriň täze belentliklerine tarap ynamly gadam goýýar. Hormatly Prezidentimiziň parasatly baştutanlygynda amala aşyrylýan giň gerimli özgertmeler, milli ykdysadyýetimiziň kuwwatly ösüşi we Watanymyzyň halkara giňişlikdäki belent abraýy hut asyrlarboýy kemala gelen milli gymmatlyklarymyza ygrarlylygyň netijesinde gazanylýan üstünlikleriň beýanydyr.
Ýurdumyzyň ykdysady we medeni durmuşynda gazanylýan üstünlikler, ýetilýän sepgitler döwletimizi durmuş-ykdysady taýdan ösdürmegiň meýilnamalarynyň amala aşyrylýandygynyň subutnamasydyr. Şu nukdaýnazardan, 2026-njy ýylyň «Garaşsyz, baky Bitarap Türkmenistan — bedew batly at-myradyň mekany» diýlip yglan edilmegi halkymyzyň ruhy dünýäsini we döwletimiziň okgunly ösüş kuwwatyny bütin aýdyňlygy bilen açyp görkezýär. Halkymyzda bedew diňe bir gözelligiň nusgasy däl, eýsem, jebisligiň we maksada okgunlylygyň belent nyşanydyr.
Gahryman Arkadagymyzyň «Atda wepa-da bar, sapa-da», «Gadamy batly bedew» atly ajaýyp eserlerinde bellenilişi ýaly, ahalteke atlary Türkmenistanyň çäklerinde müňýyllyklaryň dowamynda synmaz söýgi we yhlas bilen kemala getirilipdir. Altyndepe, Änew, Nusaý we Dehistan ýaly gadymy medeniýet ojaklaryndan gözbaş alýan atçylyk sungatymyz şu günki günde bütindünýä medeni mirasynyň aýrylmaz bölegine öwrüldi.
Türkmen halkynyň taryhyny atsyz göz öňüne getirmek mümkin däldir. At türkmen üçin ýow gününde wepaly ýoldaş, parahatlyk döwründe bolsa durmuşyň bezegi bolupdyr. Görkana syraty, altynsow öwüşgini we çydamlylygy bilen dünýäni haýran galdyrýan behişdi bedewlerimize goýulýan sarpa häzirki wagtda döwlet syýasatynyň ileri tutulýan ugruna öwrüldi. Ahalteke atçylyk sungatynyň we atlary bezemek däpleriniň ÝUNESKO-nyň Adamzadyň maddy däl medeni mirasynyň sanawyna girizilmegi hem bu ugurdaky uly yhlasyň halkara derejesindäki belent ykrarnamasydyr.
Türkmen bedewleriniň şan-şöhraty şu ýylyň güýzünde Ýewropanyň ýüreginde täze derejä göterilip, buýsanjymyzy has-da artdyrar. 2026-njy ýylyň sentýabr aýynyň 4 — 6-sy aralygynda Niderlandlar Patyşalygynyň Kronenberg şäherindäki meşhur «Pilbergen» halkara atçylyk sport merkezinde ahalteke atlarynyň arasynda atly sport we gözellik bäsleşiginiň dünýä çempionaty geçiriler. Bu taryhy waka diňe bir halkara sport bäsleşigi bolman, eýsem, Türkmenistan bilen Niderlandlar Patyşalygynyň, şeýle-de dünýä halklarynyň arasyndaky dost-doganlyk gatnaşyklaryny medeniýet arkaly berkitmegiň ajaýyp nusgasydyr.
Çempionatyň çäklerinde guraljak «Ahalteke bedewi — gözelligiň naýbaşy nusgasy» atly halkara bäsleşik dünýä jemgyýetçiligine türkmen nakgaşlarynyň, heýkeltaraşlarynyň, zergärleriniň we halyçylarynyň döredijilik dünýäsini giňden açyp görkezmäge mümkinçilik berer. Meşhur «Galkynyş» milli at üstündäki oýunlar toparynyň bu ýerdäki çykyşlary bolsa dünýäniň atçylyk muşdaklaryna türkmen halkynyň merdanalygyny we bedew bilen bagry badaşan durmuş hakykatyny nobatdaky gezek açyp görkezer. Ýewropanyň merkezinde belende galdyryljak bu medeni baýdak milli gymmatlyklarymyzy dünýä ýaýmakda döwlet tarapyndan alnyp barylýan yzygiderli işleriň miwesidir.
Ýurdumyzyň ykdysady özgertmeleriniň hem hut atlaryň okgunlylygy, ýagny bedew bady bilen baglanyşdyrylmagy özboluşly many-mazmuna eýedir. Hormatly Prezidentimiziň amala aşyrýan çuňňur oýlanyşykly syýasaty netijesinde, makroykdysady görkezijiler yzygiderli ösýär, ykdysadyýetiň we senagatlaşdyrmagyň täze derejä çykmagy üpjün edilýär. Häzirki döwürde ulag-logistika, energetika we sanly ykdysadyýet ýaly ugurlarda amala aşyrylýan iri taslamalar Ýewraziýa giňişliginde täze ykdysady halkalary we «kerwen ýollaryny» kemala getirýär. Ykdysadyýetdäki bu depginli ösüşler 2026-njy ýylyň «Garaşsyz, baky Bitarap Türkmenistan — bedew batly at-myradyň mekany» diýen şygary bilen doly utgaşýar. Maksatnamalaýyn özgertmeleriň netijesinde gazanylýan her bir ýeňiş hem-de durnukly ösüş Gahryman Arkadagymyzyň «Döwlet adam üçindir!» diýen ynsanperwer şygarynyň we Arkadagly Gahryman Serdarymyzyň «Watan diňe halky bilen Watandyr! Döwlet diňe halky bilen döwletdir!» diýen belent ýörelgeleriniň dabaralanmasydyr.
Ýurdumyzyň çar künjeginde açyljak täze binalar we desgalar Watanymyzda bellenilýän iň naýbaşy baýram bolan Garaşsyzlyk gününiň dabaralary mynasybetli ajaýyp sowgat bolar. Şähergurluşyk maksatnamasynyň çäklerinde gurlup ulanmaga beriljek önümçilik we durmuş-medeni maksatly binalar ýurdumyzyň ykdysady kuwwatyny tassyklamak bilen birlikde, halkymyzyň durmuş üpjünçiligini yzygiderli ýokarlandyrmaga gönükdirilendir. Açyljak her bir täze bina, medeniýet öýi, döwrebap çagalar baglary we mekdepler, senagat toplumlary döwletimiziň abadan geljege tarap ynamly gadamlarynyň aýdyň şöhlelenmesidir.
Täze taryhy döwürde döwletlilik ýörelgelerimiziň dowamatlygy, durmuşymyzyň bagtyýarlygy, röwşen geljege ynamymyz milli gymmatlyklara goýulýan sarpadan gözbaş alýar. Türkmen halky özüniň behişdi bedewleri bilen dünýä medeniýetine uly goşant goşdy. Şu günki gazanylýan ähli üstünliklerde hem milli ruhumyzdan gözbaş alýan güýç-kuwwat duýulýar. Garaşsyz, hemişelik Bitarap Türkmenistanyň dünýäniň syýasy we ykdysady giňişligindäki ornuny berkitmek, halkymyzyň abadan ýaşaýşyny üpjün etmek ugrunda beýik işleri amala aşyrýan hormatly Prezidentimiziň, Gahryman Arkadagymyzyň janlary sag, ömürleri uzak bolsun!