Mukaddes Garaşsyzlyk halkymyzyň asyrlaryň dowamynda kalbynda beslän beýik arzuwlarynyň wysal bolmagydyr. Ol halkymyzyň öz ykbalyny özbaşdak kesgitlemäge, milli döwletlilik däplerini täze taryhy şertlerde mynasyp dowam etdirmäge, döredijilik kuwwatyny doly açmaga giň ýol açdy. Watanymyz Garaşsyzlygymyzyň şanly 35 ýyllyk toýuna uly ruhubelentlik bilen barýar. Bu şanly sene geçen şöhratly ýola buýsanç bilen nazar aýlamaga, häzirki ösüşleriň gadyr-gymmatyna düşünmäge we geljekki beýik maksatlara ynam bilen garamaga mümkinçilik berýär.
Garaşsyzlyk ýyllarynda ýurdumyzyň durmuşynyň ähli ugurlarynda düýpli özgertmeler geçirildi, belent ösüşlere ýetildi. Hormatly Prezidentimiziň baştutanlygynda döwletimiz häzirki zaman şähergurluşygynyň, kuwwatly senagat önümçiliginiň, döwrebap ulag we energetika ulgamlarynyň, ösen oba hojalygynyň, sanly tehnologiýalara esaslanýan täze mümkinçilikleriň mekanyna öwrüldi. Ylym-bilim, medeniýet, saglygy goraýyş we beýleki ulgamlarda amala aşyrylýan işleriň ählisi halkymyzyň bagtyýar we abadan durmuşyny üpjün etmäge gönükdirilýär.
Arkadagly Gahryman Serdarymyzyň parasatly baştutanlygynda Garaşsyz Türkmenistan ösüşiň täze tapgyryna ynamly gadam urýar. Ýurdumyzda durmuşa geçirilýän giň gerimli özgertmeler döwletimiziň ykdysady kuwwatyny pugtalandyrmaga, önümçilik mümkinçiliklerini giňeltmäge, şäherleriň we obalaryň keşbini döwrebaplaşdyrmaga, halkyň ýaşaýyş-durmuş derejesini has-da ýokarlandyrmaga gönükdirilýär. Döwletimiziň öňünde goýýan maksatlarynda ykdysady ösüş bilen birlikde adam hakyndaky alada, jemgyýetiň abadançylygy we geljek nesilleriň röwşen durmuşy esasy orun eýeleýär.
Gahryman Arkadagymyzyň milli döwletlilik ýörelgelerine, halkymyzyň asylly däp-dessurlaryna, döredijilikli zähmete we bagtyýar durmuşa esaslanan başlangyçlary häzirki döwürde täze many-mazmun bilen dowam etdirilýär. Bu dowamatlylyk döwletimiziň ösüş ýolunyň yzygiderliligini we milli maksatlaryň bitewüligini aňladýar.
Türkmen halky döwletli işiň düýbüni tutmazdan ozal, hemmelere bähbitli boljak möhüm maslahaty geçirmegi adaty däbe öwürdi. Türkmenistanyň Halk Maslahatynyň işinde halkyň bähbitlerini nazara almak, ýurdumyzyň ösüşiniň möhüm ugurlaryny ara alyp maslahatlaşmak, döwletimiziň kuwwatyny has-da pugtalandyrmak ýaly asylly maksatlar öz beýanyny tapýar. Garaşsyzlygyň 35 ýyllyk baýramynyň öňüsyrasynda Türkmenistanyň Halk Maslahatynyň nobatdaky mejlisiniň geçirilmegi hem aýratyn ähmiýete eýedir. Onda kabul ediljek çözgütleriň halkymyzyň ýaşaýyş-durmuş derejesiniň has-da gowulanmagyna, ýurdumyzyň mundan beýläk-de gülläp ösmegine gönükdiriljekdigini buýsanç bilen aýdyp bileris.
Türkmenistanyň Halk Maslahatynyň nobatdaky mejlisi «Garaşsyz, baky Bitarap Türkmenistan — bedew batly at-myradyň mekany» ýylynda taryhy ähmiýetli jemgyýetçilik-syýasy wakasyna öwrüler. Ýeri gelende belläp geçsek, şu ýylyň «Garaşsyz, baky Bitarap Türkmenistan — bedew batly at-myradyň mekany» diýen şygary hem Garaşsyz Watanymyzyň belent ösüş ruhuny özünde jemleýär.
Şanly toýuň bosagasynda duran Garaşsyz ýurdumyz täze sepgitlere tarap bedew bady bilen öňe barýar. Halkymyzyň agzybirligi, döwletimiziň kuwwaty, parahatçylyk söýüjilikli ýörelgelerimiz we geljege bolan mizemez ynamymyz eziz Watanymyzyň täze üstünlikleriniň berk kepilidir. Döwlet ähmiýetli beýik işleri durmuşa geçirýän Gahryman Arkadagymyzyň, Arkadagly Gahryman Serdarymyzyň janlary sag, belent başlary aman bolsun! Il-ýurt bähbitli alyp barýan işleri mydama rowaçlyklara ýar bolsun!