1. ESASY DÜŞÜNJELER WE KESGITLEMER

1. 1. Emeli aň ugry boýunça «AI Solutions» atly hakaton (mundan beýläk – hakaton) -  ýurdumyzyň ýokary okuw mekdepleriniň talyplarynyň arasyndan Emeli aň ugry boýunça döreýän meseleleri ýüze çykarmaga, bu meseleler üçin döwrebap çözgütleri işläp taýýarlamaga ukyply ýaş zehinleri ýüze çykarmak maksady bilen hakaton formatynda geçirilýän bäsleşikdir.
   2. Hakatonyň guramaçysy - Türkmenistanyň Telekommunikasiýalar we informatika instituty (mundan beýläk – Guramaçy).
   3. Hakatonyň operatory -  Türkmenistanyň Telekommunikasiýalar we informatika institutynyň binýadyndaky “Sanly Çözgüt IT meýdança” hojalyk jemgyýeti. Bäsleşik geçirilýän döwründe tehniki serişdeler we programmirleme dilleri bilen üpjünçilige jogapkärdir.
   4. Hakatonyň netijeleriniň bahalandyrmasy -  netijeleri bahalandyrmak üçin Guramaçy tarapyndan ýörite eminler topary düzülýär.
   5. Hakatonyň resmi saýty – bäsleşige gatnaşmak üçin ýüz tutmak we ýazylmak üçin zerur bolan maglumat çeşmeleri institutyň Internet ulgamyndaky  resmi http://itit.edu.tm Web saýtynda ýerleşdirilýär.
   6. Gatnaşyjy – bäsleşige gatnaşmaga isleg bildiren, Türkmenistanyň ýokary okuw mekdepleriniň haýsydyr birinde okaýan talyp.
   7. Topar – hakatonyň geçirilýän meýdançasynda bäsleşikde berlen ýumuşlary ýerine ýetirýän gatnaşyjylaryň topary. Hakatona gatnaşmak üçin her gatnaşyjynyň hökmany suratda, haýsy hem bolsa bir toparyň agzasy bolmagy hökmandyr. Topardaky gatnaşyjylaryň sany çäklendirilen bolup – her toparyň agzalarynyň sany 4 gatnaşyjydan köp bolmaly däldir.
   8. Bäsleşige gatnaşmak üçin ýüz tutma - bäsleşige gatnaşmaga isleg bildirýän talyplar institutyň resmi saýtynda ýerleşdirilen hakatona degişli nusgany dolduryp ttweii.basleshik@gmail.com email salgysyna ugratmalydyrlar. Elektron hasaba alyş nusgasynyň doldurylyşy bildirilýän talaplara laýyk gelmedik ýagdaýynda, Guramaçy we Operator tarapyndan talyp bäsleşige goýberilmeýär.
   9. Bäsleşigiň ýumuşy – bäsleşige gatnaşýan toparlaryň gatnaşyjylary tarapyndan ýerine ýetirilmegi üçin bäsleşikde berilýän ýumuşlaryň ugurlary şu düzgünnamanyň 4.6-njy bölüminde görkezilýär.
   10. Netije – “F1 weighted” bahalandyrma synplaşdyrmasy boýunça metrik takyklykdaky bahalaryň netijesi Web saýtda görkezilýär.
   11. Hakatonyň ýeňijisi -  düzgünnamanyň 7-nji we 8-nji bölümlerinde görkezilen talaplara laýyklykda eminler toparynyň bahalandyrmasy esasynda bäsleşikde berlen ýumuşlary ýerine ýetirmek boýunça ähli ugurlar boýunça iň köp utugy toplan gatnaşyjylaryň topary hakatonyň ýeňijisi diýlip yglan edilýär.
   12. Eminler – hakatonyň çäginde gatnaşyjy toparlaryň netijelerini bahalandyrmak üçin Guramaçy tarapyndan 8 adamdan az bolmadyk eminler topary düzülýär. Eminler toparynyň düzümine IT ugurly dersleri okadýan mugallymlar hem-de şol ugurdan ekspert bolan hünärmenler girýär. Eminler toparynyň başlygy bahalandyrma prosedurasynda aýgytlaýjy sesi bärmäge hukukly bolup, emin agzalaryň sesini jemlemek bilen bäsleşigiň ýeňijisini yglan edýär.
   13. Baýrak – hakatonyň ýeňijisine Guramaçy tarapyndan berilýän diplom we ýadygärlik sowgatlary.

2. HAKATONYŇ MAKSATLARY

1. 1. Hakatony geçirmegiň esasy maksatlaryna indikiler degişlidir:
      1. Türkmenistanyň Prezidentiniň degişli kararlary bilen tassyklanan “Türkmenistanda sanly bilimi ösdürmegiň Konsepsiýasyndan” we “Türkmenistanda sanly ykdysadyýeti ösdürmegiň 2021-2025-nji ýyllar üçin Döwlet maksatnamasynyň hem-de  ony amala aşyrmak boýunça ýerine ýetirilmeli çäreleriň Meýilnamasyndan” gelip çykýan wezipeleri ýokary derejede ýerine ýetirmäge ukyply ýaş zehinleri ýüze çykarmak.
      2. Ýurdumyzyň ýokary okuw mekdeplerinde sanly bilimi ornaşdyrmagyň çäklerinde talyplaryň arasynda Emeli aň tehnologiýasyndan peýdalanmagyň usullaryny ýaýbaňlandyrmak.
      3. Hakatonyň tehnologik meseleleri üçin döwrebap çözgütleri işläp taýýarlamak.
      4. Talyplaryň hakyky meseleleri çözmek arkaly kreatiw pikirlenmegini hem-de toparda işlemek ukybyny ösdürmek.
      5. Emeli aň ugry boýunça ukyply milli hünärmenleri taýýarlamak işini kämilleşdirmek.
      6. Emeli aň ugry boýunça talyp ýaşlaryň ukyplaryny açyp görkezmek we bu ugurdan ökde hünärmenlere bolan zerurlyklary kesgitlemek.
      7. Emeli aňy ulanyp, köp meseleleriň aňsat çözgüdini tapmak mümkindigini talyplara düşündirmek we bu ugurda ukyp-başarnyklaryny türgenleşdirmek.
   2. Geçirlýän hakatonyň netijesi hem-de Guramaçynyň syny boýunça bäsleşigiň çäginde taýýarlanan taslamany önümçilige ornaşdyrmak maksady bilen teklip etmek.

3. HAKATONYŇ GURAMAÇYLYGY

3. 1. Hakatony gurnamak we geçirmek Türkmenistanyň Telekommunikasiýalar we informatika instituty tarapyndan amala aşyrylýar.
   2. Hakatonyň Guramaçysy tarapyndan, geçiriliş düzgünleri we möhleti, gatnaşyjylary hasaba almak baradaky degişli nusgalar resmi Web saýtynda ýerleşdirilýär.
4. HAKATONY GEÇIRMEGIŇ MÖHLETI

1. 1. Hakaton 2026-njy ýylyň fewral aýynyň 21-nde geçirilýär.
   2. Gatnaşmak üçin isleg bildirýänleriň sanawyny ttweii.basleshik@gmail.com elektron poçtasyna ugratmalydyrlar. Bäsleşige gatnaşmak üçin Hasaba almak 2026-njy ýylyň fewral aýynyň 5-nden başlanyp, fewral aýynyň  18-ne tamamlanýar.
   3. Gatnaşyjylaryň sany çäklendirilip, her topar hasaba alnanda agzalarynyň sany 4 gatnaşyjydan köp bolmazlyk şerti hereket edýär.
   4. Hakatonyň Guramaçysynyň resmi Web saýtda bildiriş görnüşli maglumat ýerleşdirmek bilen gatnaşyjylary hasaba almagy görkezilen wagtyndan öň togtatmaga hukugy bardyr.
   5. Hakatona gatnaşmak üçin hasaba alnan toparlaryň we olaryň düzümindäki gatnaşyjylaryň sanawy 2026-njy ýylyň fewral aýynyň 19-na çenli     resmi Web saýtda ýerleşdirilýär.
   6. Hakatonda ýerine ýetirmek üçin berilýän bäsleşigiň ýumuşlary indiki ugurlary özünde jemleýär:
      1. Emeli aň ulanyp, ulanyjynyň derejesine görä sorag berýän we netijä esaslanyp akylly baha çykarýan test ulgamyny döretmeli.
   7. 2026-njy ýylyň 21-nji fewralynda Türkmenistanyň Telekommunikasiýalar we informatika institutynyň binýadyndaky “Sanly Çözgüt IT meýdança” hojalyk jemgyýetiniň binasynda eminler topary tarapyndan kesgitlenen hakatonyň ýeňijisini sylaglamak dabarasy geçiriler.

5. HAKATONYŇ ŞERTLERI BARADA HABAR BERMEK

1. 1. Hakatonyň geçiriliş tertibi, möhleti we düzgünleri barada gatnaşyjylary habardar etmek Guramaçynyň resmi http://itit.edu.tm salgyly Web saýtynyň üsti bilen amala aşyrylýar. Bäsleşigiň düzgünnamasyna Guramaçynyň üýtgeşme girizmäge hukugy bolup, girizilen üýtgeşmeler ýokarda agzalan resmi Web saýtda çykarylandan soňra güýje girýär.

6. GATNAŞYJYLARY HASABA ALMAGYŇ TERTIBI

• 1. Hakatona gatnaşmaga isleg bildirenleri hasaba almak düzgünnamanyň 4-nji bölüminde görkezilen möhletde Internet torunyň üsti bilen Guramaçynyň resmi Web saýtynda elektron görnüşinde ýerine ýetirilýär. Hakatona gatnaşmak isleýänleriň elektron nusgasyny dolduryp ibermek bilen gatnaşyjylar şu düzgünnamanyň şertleri bilen tanyşandyklaryny beýan edýärler.
  2. Hakaton bäsleşigine gatnaşmak üçin ýüz tutma we gatnaşyjylaryň sanawyna goşulmak indiki tertipde geçirilýär:
     1. Ilkinji nobatda görkezilen nusga laýyklykda bäsleşige gatnaşyjy toparyň ady we beýleki degişli maglumatlar bilen toparyň baştutany hasaba alynýar. Toparyň baştutany topar agzalaryny Web saýtda hasaba aldyrmaga we özi hem-de topar agzalary baradaky degişli maglumatlary dogry girizmäge borçlanýar.
     2. Gatnaşyjynyň hasaba alyş nusgasy doldurylanda indiki maglumatlaryň doly we dogry ýazylmagy hökmandyr:
• Toparyň ady;
• Topar baştutanynyň familiýasy, ady we atasynyň ady;
• Elektron poçta salgysy;
• Telefon belgisi;
• Topar baştutanynyň talyp şahadatnamasynyň elektron nusgasy;
• Topar agzalary barada maglumatlar.
  3. Hakaton bäsleşige gatnaşmak üçin hasaba alynmak we gatnaşmak tölegsiz esasda ýerine ýetirilýär.
  4. Guramaçynyň hakatona gatnaşyjylar baradaky alnan maglumatlaryň we gatnaşyjylaryň sanawynyň redaktirlenmegine we bäsleşigi mahabat etmek maksady bilen gatnaşyjylara habar bermezden Türkmenistanda hereket edýän degişli kanunçylyk namalarynyň çygrynda ulanylmagyna hukugy bardyr.

7. NETIJELERI BAHALANDYRMAGYŇ TALAPLARY WE ÝEŇIJINI KESGITLEMEGIŇ TERTIBI

1. 1. Hakatonyň ýeňijisini kesgitlemek, toparlaryň hödürlän tehniki çözgütleriniň we programmirleme boýunça işleriniň netijesinde taýýarlan taslamasyna eminler toparynyň berýän bahasynyň jemi boýunça kabul edilen çözgüt bilen amala aşyrylýar.
   2. Bäsleşige gatnaşan toparlar tarapyndan hödürlenen çözgüdiň bahalandyrylmasy “F1 weighted” bahalandyrma synplaşdyrmasy boýunça metrik takyklykdaky bahalaryň jemi boýunça bahalandyrylýar. Bu bahalandyrma ulgamyna laýyklykda iň gowy çözgüt iň ýokary metrik görkezijilere eýe bolýar.
   3. Netijeleri bahalandyrmagyň usulyýeti:
      1. Gatnaşyjy toparlaryň işiň tehniki çözgütlerini tapyşlary we programma üpjünçiliginiň işlenilişi boýunça bahalandyrma üçin hökmany suratda emin agzalarynyň ýekebara bahalandyrma usuly peýdalanylýar.
      2. Taslamanyň ýerine ýetirilişi boýunça umumy baha düzgünnama goşulan 1-nji goşunda laýyklykda eminleriň bahalandyrmasynyň jemi görkezijisini goşmak arkaly berilýär.
   4. Hakatonyň final tapgyry tamamlanandan soňra eminler topary tarapyndan ýeňiji kesgitlenýär. Eminleriň çözgüdi beýanda görkezilýär we hakatonyň netijeleri boýunça maglumat Web saýtda ýerleşdirilýär.

8. HAKATONY JEMLEMEK

1. 1. Hakatonyň netijeleri boýunça maglumatlar Web saýtda ýerleşdirmek bilen görkezilýär.
   2. Bäsleşigiň netijesi boýunça ýeňiji bolan topary sylaglaýyş dabarasynda baýrak topar baştutanyna gowşurylýar.
   3. Bäsleşigiň netijesi boýunça baýragyň ýeňiji bolan toparyň agzalarynyň arasynda paýlanylyşyna Guramaçy jogapkärçilik çekmeýär.

9. HAKATONA GATNAŞYLANDA BERJAÝ EDILMELI ŞERTLER

1. 1. Gatnaşyjynyň hukuklary:
      1. Bäsleşigiň Guramaçysyndan ýa-da operatorynda bäsleşigi geçirmek baradaky düzgünnamany sorap almaga.
      2. Bäsleşige gatnaşmaga isleg bildirip ýüz tutan fiziki şahsyň maglumatlary talaba laýyk däl diýip hasap edilip, bäsleşige goýberilmedik ýagdaýynda özi barada maglumatlary dolduran elektron nusgasyny Guramaçydan we operatordan soramaga.
      3. Eminler toparynyň çözgüdi bilen ylalaşmadyk ýagdaýynda gaýtadan bahalandyrma üçin seredilmegini talap edip Guramaça ýa-da operatora ýüz tutmaga.
   2. Hakatony geçirmek bilen bagly düzgünnamalar we şertler, şol sanda ýeňiji kesgitlemek boýunça netijeler ähli gatnaşyjylaryň dykgatyna ýetirilmelidir.
   3. Hakatony geçirmegiň möhletinde ýa-da düzgünlerinde üýtgeşme girizilen ýagdaýynda Guramaçy maglumatlary Web saýta ýerleşdirmek arkaly gatnaşyjylary habardar etmeklige borçlanýar.
   4. Şu düzgünnama bilen tanyşandygyny beýan etmek bilen, bäsleşige gatnaşyjy özi tarapyndan indiki şertleriň berjaý ediljekdigini kepillendirýär:

• • Bäsleşigiň geçirilýän meýdançasynda Internet ulgamyndan diňe bäsleşikde berlen ýumuşlary ýerine ýetirmek üçin peýdalanmaklygy;
  • Inellektual eýeçilik we awtorlyk hukugynyň bozulmazlygyny berjaý etmekligi;
  • Bäsleşikde ulanylýan maglumat ulgamlaryna zyýanly programmalary, wiruslary ýüklemezligi we maglumat howpsuzlygyna bildirilýän talaplary berjaý etmekligi;

1. 5. Hakatonyň Guramaçysy bäsleşigiň netijeleri boýunça taýýarlanan taslamalary, çözgütleri we teklipleri ulanmak hukugyna eýedir.

10.  JEMLEÝJI DÜZGÜNLER

1. 1. Hakaton Türkmenistanda hereket edýän hukuk namalarynyň we şu düzgünnamanyň çygrynda Türkmenistanyň Telekommunikasiýalar we informatika instituty tarapyndan “Sanly Çözgüt IT meýdança” hojalyk jemgyýetiniň binasynda geçirilýär.
   2. Bäsleşigiň Guramaçysy, operatory we gatnaşyjylar şu düzgünnamanyň talaplaryny berjaý etmäge doly borçlanýar.

Guramaçylyk topary

Telefon: +99312942899, +99365537884

e-mail: nurysaryyew2@gmail.com

ttweii.basleshik@gmail.com