Çagalaryň altyn aşygy alçy gopan mukaddes bilim ojagy
Türkmenistanyň Prezidentiniň ýurdumyzyň bilim ulgamyny kämilleşdirmek maksady bilen kabul eden Permanlaryndan, Kararlaryndan, “Türkmenistanda çaganyň irki ösüşini we mekdebe taýýarlygyny ösdürmek babatda 2020-2025-nji ýyllarda mekdebe çenli çagalar edaralarynyň işini kämilleşdirmegiň Maksatnamasyndan”, “Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasyndan” gelip çykýan wezipeleri mekdebe çenli çagalar edaralarynyň işine ornaşdyrmak, şeýle-de çagalara ýokary hilli bilim we terbiýe bermek, olaryň zehinini ýüze çykarmak, çagalary durmuşa taýýarlamak babatda giň gerimli işler alnyp barylýar. Türkmen halky öz durmuşynyň bezegi, geljeginiň nesil baýlygy hasaplaýan çagalaryna, olaryň bilim-terbiýesine, sagdyn ösüşine aýratyn üns berýän halklaryň biridir. Hormatly Prezidentimiziň belleýşi ýaly: “Çagalaryň bagtyýar durmuşy we sazlaşykly ösüşi Watanymyzyň abadançylygynyň kepilidir. Olaryň abadan bagtyýar durmuşyny üpjün etmek, şahsyýet hökmünde kemala gelmegi hem-de ukyp-başarnyklarynyň doly açylmagy üçin şertleriň döredilmegi Watanymyzyň, halkymyzyň röwşen geljegi ugrundaky uly jogapkärçilige esaslanýan tagallalarymyzyň baş maksadydyr”. Çaganyň mekdebe çenli irki ösüş döwri şahsyýetiň kemala gelmeginiň başlangyjy hasaplanýar, bu döwürde çaga terbiýesini dogry guramak, diňe bir ata-eneler üçin däl, mekdebe çenli bilim işgärleriniň öňünde hem uly borç bolup durýar. Garaşsyz, Bitarap watanymyzda çagalar baglarynyň we bakjalarynyň giň ulgamy hereket edýär. Döwrebap multimediýa tehnologiýalary bilen enjamlaşdyrylan Lebap welaýatynyň Kerki etrabynyň 24-nji çagalar bakja-bagy 2013-nji ýylda gurlup ulanylmaga berildi. Ata-eneleriň perzentleriniň bu çagalar bakja-bagynda bilim we terbiýe almagyna bolan höwesi ýyl-ýyldan has artýar. Çagalar bakja-bagynda okatmagyň işjeň usullaryndan peýdalanýan, işine ussat, çagalaryň söýgüsini gazanan terbiýeçiler zähmet çekýärler. Bu bilim ojagynda körpeleriň şadyýan sesi “Halkara parahatçylyk we ynanyşmak” ýylynda has-da belentden ýaňlandy. Çünki agzybir bilim işgärleriniň, zehinli körpeleriň gatnaşmagynda geçirilýän bäsleşiklerdir, çärelerde olaryň üstünlikleri sanardan köp boldy, has dogrusy çagalaryň dilinde olaryň aşygy alçy gopdy. Çagalar bakja-bagynyň müdiri Solmaz Rahymowa 22 ýyldan bäri tutanýerli zähmet çekmek bilen, öňdebaryjy bilim işgäri, hünärine ussat zenan hökmünde özüni tanatdy. 2025-nji ýylda çagalar bakja-bagynyň müdiri Solmaz Rahymowa bilim işgärleriniň arasynda geçirilen “Iň göreldeli çagalar bagynyň müdiri” bäsleşiginiň döwlet tapgyrynda II orna mynasyp bolup, Türkmenistanyň Bilim ministrliginiň “Hormat haty” we gymmat bahaly sowgadyna mynasyp boldy. “Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasyndan” gelip çykýan wezipeleri çagalar bakja-bagynyň işine ornaşdyrmakda oňyn netijeleri gazanmak boýunça degişli işler yzygiderli dowam edilýär. Çagalar bagynyň bilim işgärleri her bir geçirilýän usuly-amaly maslahatlara, usuly okuwlara işjeň gatnaşyp, öz iş tejribelerini baýlaşdyrýarlar. Çaga terbiýesinde hereketli milli oýunlaryň ähmiýeti uly bolup, many-mazmunly oýunlar çaganyň hereketlerini, sözleýşini, endiklerini, logiki pikirlenmesini ösdürmekde we olary mekdebe taýýarlamakda möhümdir. Terbiýeçiler, mugallymlar okuw sapaklaryny öwrediji oýunlaryň üsti bilen işjeň usulda geçýärler. Çagalaryň sagdyn bedenli bolmagy üçin dürli döwrebap usullardan peýdalanýarlar. Açyk gapylar güni, göreldeli sapaklary, göwnaçma çäreleri ýokary derejede gurnamagy, bäsleşmegi bu çagalar bagynyň işgärleri öz öňlerinde wezipe edip goýýarlar. Soňky üç ýylyň dowamynda etrapda, welaýatda körpeleriň arasynda dürli ugurlar boýunça geçirilýän bäsleşiklerde bu çagalar bakja-bagynyň zehinli körpeleri has öňe saýlandylar. “Garaşsyzlygyň saýrak bilbilleri”, “Altyn aşygym, alçy gop!” ýaly körpeleriň aýdym we tans toparlarynyň bäsleşikleri olaryň ruhuny göterýär. Uly (mekdebe taýýarlaýyş) toparynyň körpeleri Elwan Orazmyradowa, Mylaýym Baýrammyradowa, Gülnur Baratowa, Gülmira Buriýewa, Nurjemal Selimberdiýewa, Atajan Allaberdiýew dagylar “Nowruz nagmalary” atly körpeleriň folklýor topary öz zehinlerini, ukypdyr başarnyklaryny görkezip, bäsleşiklerde baýrakly orunlara mynasyp bolup, “Hormat haty” bilen sylaglandylar. Kerki etrabynyň 24-nji çagalar bakja-bagynyň terbiýeçileri Şirinjemal Şukurowa 2024-nji ýylda, Şemşat Hojageldiýewa 2025-nji ýylda terbiýeçileriň arasynda geçirilen “Ýylyň terbiýeçisi“ bäsleşiginiň döwlet tapgyryna gatnaşyp, höweslendiriji baýraklara mynasyp boldular. Türkmenistanyň Prezidentiniň Türkmenistanda bilim ulgamyny kämilleşdirmek hakyndaky Permanlaryndan, Kararlaryndan, “Türkmenistanda çaganyň irki ösüşini we mekdebe taýýarlygyny ösdürmek babatda 2020-2025-nji ýyllarda mekdebe çenli çagalar edaralarynyň işini kämilleşdirmegiň Maksatnamasyndan”, “Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasyndan” gelip çykýan wezipeleri mekdebe çenli çagalar edaralarynyň işine ornaşdyrmak, şeýle-de çagalara ýokary hilli bilim we terbiýe bermek, olaryň zehinini ýüze çykarmak, çagalary mekdebe hem-de durmuşa taýýarlamak babatda giň gerimli işler alnyp barylýar. Watanymyzyň geljegi bolan ýaş neslimiz üçin uly aladalary edýän we olara uly söýgi bilen garaýan Hormatly Prezidentimiziň jany sag, il bähbitli beýik işleri rowaç bolsun! Güljahan Jumaýewa, Lebap welaýat Baş bilim müdirliginiň mekdebe çenli bilim bölüminiň müdiri