Halkara ynsanperwer ylymlary we ösüş uniwersitetiniň talyplary Bitaraplyk binasyndaky muzeýe gezelenç etdiler

Bilşimiz ýaly, halkara Bitaraplyk gününe we Türkmenistanyň hemişelik Bitaraplyk hukuk derejesine eýe bolmagynyň 30 ýyllygyna bagyşlanyp, Aşgabadyň özboluşly binagärlik gözelliginiň, ýagny döwrebaplaşdyrylan «Bitaraplyk» binasynyň açylyşy boldy. Halkara ynsanperwer ylymlary we ösüş uniwersitetiniň talyplary hem Bitaraplyk binasyndaky muzeýe gezelenç etdiler. Onuň barşynda talyplar Türkmenistanyň hemişelik Bitarap derejesiniň taryhy, oňyn diplomatiýanyň aýratynlyklary we özboluşly baý taryhy barada gürrüň berýän ajaýyp eksponatlar bilen tanyşdylar. «Bitaraplyk» binasynyň içinde Türkmenistanyň Döwlet medeni merkeziniň Döwlet muzeýiniň «Bitaraplyk muzeýiniň» şahamçasy ýerleşýär. Muzeýiň ekspozisiýasy myhmanlary döwletiň içeri we daşary syýasatynyň çäklerindäki iň möhüm wakalar bilen tanyşdyrýar. Görkezilýän resminamalar, fotosuratlar we eksponatlar Türkmenistanyň Bitaraplygynyň diňe bir sebit howpsuzlygyny we durnuklylygyny üpjün etmän, eýsem, bütin dünýäde parahatçylygy berkitmegiň kepili bolup durýandygyny, şeýle hem özara bähbitli halkara hyzmatdaşlygyna ýardam edýändigini görkezýär. Maglumatlaryň elýeterliligini üpjün etmek üçin muzeýiň ekspozisiýasy döwrebap maglumat tehnologiýalary bilen üpjün edilendir. Ähli maglumatlar interaktiw suwuk kristal (LED) ekranlarda üç dilde: türkmen, iňlis we rus dillerinde hödürlenýär. Türkmenistanyň Döwlet medeni merkeziniň Döwlet muzeýiniň «Bitaraplyk muzeýiniň» şahamçasynyň hünärmenleri gezelenjiň dowamynda talyp ýaşlary muzeýiň baý ekspozisiýasy bilen tanyşdyrdy. Şeýle hem Gahryman Arkadagymyzyň we Arkadagly Gahryman Serdarymyzyň türkmen milli diplomatiýasyny dünýä tanatmakda tagallalary barada giňişleýin gürrüň berdiler. Şeýle medeni çäreleriň yzygiderli geçirilmegi ýaşlaryň watançylyk duýgularynyň ösdürilmegine, ruhy dünýäsiniň baýlaşmagyna, taryha we mirasa bolan hormatynyň artmagyna, olaryň medeni-diplomatik tärlerini öwrenmeklige uly täsirini ýetirýär. Çeşmesi: Türkmenistanyň Bilim ministirligi