Koreýa Respublikasynyň wekiliýeti bilen duşuşyk geçirildi

Halkara parahatçylyk we ynanyşmak ýyly, Halkara Bitaraplyk güni we Türkmenistanyň hemişelik Bitaraplygynyň 30 ýyllygy mynasybetli geçirilen Halkara forumyna Koreýa döwletinden gelen wekiliýet bilen Türkmenistanyň Oguz han adyndaky Inžener-tehnologiýalar uniwersitetinde duşuşyk geçirildi. Duşuşyga Koreýa Respublikasynyň Bütindünýä innowasiýalary öwreniş institutynyň başlygy Kim Çžin Pýo-nyň ýolbaşçylygyndaky wekiliýetiň düzüminde Bütindünýä innowasiýalary öwreniş institutynyň direktory Kim Gýo Şik, Koreýa Respublikasynyň DYPNF kompaniýasynyň prezidenti Ýu Býon Guk, Koreý telekeçileriniň bütindünýä birleşiginiň direktory An Sym Bom, Koreýa Respublikasynyň Daşary işler ministrliginiň Demirgazyk we Merkezi Aziýa ýurtlarynyň býurosynyň direktory Pak He Jin Koreýa Respublikasynyň Daşary işler ministrliginiň Demirgazyk we Merkezi Aziýa ýurtlarynyň býurosynyň direktorynyň orunbasary Nan Jim, Koreýa Respublikasynyň Daşary işler ministrliginiň Demirgazyk we Merkezi Aziýa ýurtlarynyň býurosynyň direktorynyň ikinji sekretary Li Je San, Koreýa Respublikasynyň Daşary işler ministrliginiň Demirgazyk we Merkezi Aziýa ýurtlarynyň býurosynyň direktorynyň üçünji sekretary Kim Daýhun gatnaşdylar. Özara duşuşyk Türkmenistanyň Oguz han adyndaky Inžener-tehnologiýalar uniwersiteti bilen, esasan, bilim we ylym ulgamlarynda netijeli hyzmatdaşlygy ýola goýmaklyga bagyşlandy. Ikitaraplaýyn duşuşykda dünýä ülňülerine laýyk gelýän hünärmenleri taýýarlamagyň esasy ugurlaryna ünsi çekip uniwersitetiniň alyp barýan ylmy barlag işleri bilen giňişleýin tanyşdyryldy. Aýratyn hem emeli aň we kibersport, robototehnika we elektronika ugurlarynda hyzmatdaşlygy ösdürmekde gyzyklanmalaryň bardygy nygtaldy. Duşuşygyň çäklerinde Türkmenistanyň Oguz han adyndaky Inžener-tehnologiýalar uniwersitetiniň häzirki wagta çenli Koreýa Respublikasynyň Sungkýunkwan uniwersiteti bilen, Inha uniwersiteti bilen, dünýäniň beýleki ösen döwletleriniň öňdebaryjy ýokary okuw mekdepleri we iri kompaniýalary bilen özara düşünişmek baradaky ähtnamalarynyň bardygy bellenildi. Geçirilýän duşuşyklar mundan beýläk hem Gahryman Alym Arkadagymyzyň, Arkadagly Gahryman Serdarymyzyň parasatly ýolbaşçylygynda Koreýa Respublikasy bilen halkara hyzmatdaşlygy ösdürmäge, uniwersitetde ýerine ýetirilýän ylmy-barlag işleriniň gerimini giňeltmäge, dünýä derejesine çykarmaga ähli mümkinçilikleriň döredilendiginiň aýdyň subutnamasydyr. Türkmenistanyň Oguz han adyndaky Inžener-tehnologiýalar uniwersiteti