TEBIGATYŇ WASPÇYSY – ÇAGALARYŇ WE ULULARYŇ SÖÝGÜLI ŞAHYRY
Aşgabat şäheriniň daşary ýurt dllerini çuňlaşdyryp öwredýän ýöriteleşdirilen 52-nji orta mekdebinde Türkmenistanyň B.Amanow adyndaky döwlet çagalar kitaphanasy bilen bilelikde şahyr Atajan Annaberdiýewi ýatlap, “Tebigatyň waspçysy – çagalaryň we ulularyň söýgüli şahyry” atly edebi-sazly döredijilik duşuşygy geçirildi. Şahyryň talyplyk döwründe bile okan ýyldaşy, häzirki wagtda alym zenan, filologiýa ylymlarynyň kandidaty Gurbanjemal Ylýasowa, şeýle hem şahyryň döredijilik kesbini ýöredýän gyzy “Watan” gazetiniň bölüm redaktory şahyr Çemen Annaberdiýewa, belli žurnalistimiz, çagalar üçin birnäçe degişmeleriň awtory Akgül Saparowa, Berkakar döwletimiziň ýaş şahyry, “Medeniýet we syýhat” žurnalynyň edebi işgäri Gurbanjemal Annakowa dagy bu çäräniň hormatly myhmanlary boldular. Uzak bolmadyk manyly ömründe tebigatyň täsinligini, çagalyk dünýäsiniň gyzykly wakalaryny, mähriban enelerimizi, Watanymyzy wasp edýän, çagalar hem ulular üçin döreden gyzykly, täsirli eserlerini bize ýadygärlik galdyran “Watana bolan söýgüsi üçin” we “Gaýrat” medallarynyň eýesi, 2005-nji ýylda bolsa Döwlet tarapyndan degişmeçi ýazyjylaryň arasynda geçirilen bäşleşigiň ýeňijisi bolan Atajan Annaberdiýew türkmen edebiýatyna saldamly goşant goşan şahyrdyr. Şahyry hormatlap gelen myhmanlara Aşgabat şäheriňiň daşary ýurt dillerini çuňlaşdyryp öwredýän 52-nji orta mekdebiniň göreldeli okuwçylary ussat şahyr Atajan Annaberdiýewiň goşgularyny labyzly okap berdiler, goşgularynyň esasynda düzülen gysgajyk sahna oýunlaryny görkezdiler. Gelen myhmanlar öz gezeginde ussat şahyry ýatlap gyzykly, täsirli gürrüň berdiler. Baky Bitarap we asuda Watanymyzyň goýnunda ýaş nesillere bilimdir terbiýe bermekde döredilýän ähli mümkinçilikler üçin hormatly Prezidentimiz Arkadagly Gahryman Serdarymyza we türkmen halkynyň Milli Lideri Gahryman Arkadagymyza tüýs ýürekden alkyşlar aýdyldy. Aýjeren Hudaýberdiýewa, Aşgabat şäheriňiň daşary ýurt dillerini çuňlaşdyryp öwredýän 52-nji orta mekdebiniň kitaphanaçysy Çeşmesi: Türkmenistanyň Bilim ministirligi