Russiýa Federasiýasynda matematika bäsleşiginde uniwersitetimiziň talyplaryň gazanan halkara üstünlikleri
2025-nji ýylyň 25-30-njy noýabry aralygynda Russiýa Federasiýasynyň Moskwa şäherindäki Patris Lumumba adyndaky Halklaryň dostlugy uniwersitetiniň gurnamagynda ýokary okuw mekdepleriniň talyplarynyň arasynda Halkara matematika bäsleşigi (RUDN MATH OLYMP-2025) geçirildi. Bu bäsleşige Ýagşygeldi Kakaýew adyndaky Halkara nebit we gaz uniwersitetiniň, Magtymguly adyndaky Türkmen döwlet uniwersitetiniň, Türkmenistanyň Telekommunikasiýalar we informatika institutynyň, Türkmen döwlet ykdysadyýet we dolandyryş institutynyň, Halkara ynsanperwer ylymlary we ösüş uniwersitetiniň, S.A.Nyýazow adyndaky Türkmen oba hojalyk uniwersitetiniň, Türkmen döwlet binagärlik-gurluşyk institutynyň, Türkmenistanyň Döwlet energetika institutynyň talyplary gatnaşdylar. Ýagşygeldi Kakaýew adyndaky Halkara nebit we gaz uniwersitetiniň Sanly tehnologiýalar we kiberhowpsuzlyk fakultetiniň talyplary bäsleşikde üstünlikli çykyş edip Bendow Kerimguly şahsy hasapda geçirilen bäsleşikde birinji orny eýeläp altyn medala, Haýytmuhammedow Yslam üçünji orny eýeläp bürünç medala mynasyp boldular. Bu üstünlikler talyplaryň hemişelik Bitaraplygymyzyň şanly 30 ýyllyk baýramçylygyna özboluşly sowgady boldy. Patris Lumumba adyndaky Halklaryň dostlugy uniwersitetinde geçirilen bu abraýly bäsleşige Awstriýa Respublikasynyň, Beýik Britaniýanyň we Demirgazyk Irlandiýanyň Birleşen Patyşalygynyň, Polşa Respublikasynyň, Sloweniýa Respublikasynyň, Italiýa Respublikasynyň, Ispaniýa Patyşalygynyň, Germaniýa Federatiw Respublikasynyň hem Fransiýa Respublikasynyň ýokary okuw mekdepleriniň talyplary gatnaşdylar. Halkara derejesindäki bäsleşikde gazanylan üstünlikler ýurdumyzyň bilim ulgamynda alnyp barylýan döwlet syýasatynyň miwesidir. Russiýa Federasiýasynyň Moskwa şäherinde gazanylan ýeňişler ylym-bilim ulgamynda täze zehinli ýaşlaryň ýüze çykýandygyny, olaryň alan bilimleriniň we ukyp-başarnyklarynyň halkara derejesinde ykrar edilýändigini görkezýär. Ýagşygeldi Kakaýew adyndaky Halkara nebit we gaz uniwersiteti Çeşmesi: Türkmenistanyň Bilim ministirligi