Türkmenistanyň Bilim ministrliginiň wekilleri Russiýa Federasiýasynyň Kaliningrad sebitiniň Swetlogorsk şäherinde geçirilen Şahsyýet ukybyny ösdürmek merkezleriniň 4-nji ýyllyk maslahatyna we Halkara hyzmatdaşlarynyň duşuşygyna gatnaşdy
Türkmenistanyň Bilim ministrliginiň wekilleri 2025-nji ýylyň 27-nji oktýabry – 1-nji noýabry aralygynda Bilim ulgamynda maglumat tehnologiýalary boýunça Instituty (IITE) bile Gelejege maýa goýum haýyr-sahawat gaznasynyň bilelikde gurnamagynda Russiýa Federasiýasynyň Kaliningrad sebitiniň Swetlogorsk şäherinde geçirilen Şahsyýet ukybyny ösdürmek merkezleriniň 4-nji ýyllyk maslahatyna we Halkara hyzmatdaşlarynyň duşuşygyna gatnaşdylar. 29-njy oktýabrda Immanuel Kant adyndaky Baltika federal uniwersitetinde Şahsyýet ukybyny ösdürmek merkezleriniň 4-nji ýyllyk maslahatynyň we Halkara hyzmatdaşlarynyň duşuşygynyň açylyş dabarasy geçirildi. Maslahata we Halkara hyzmatdaşlarynyň duşuşygyna Merkezi Aziýa ýurtlaryndan Gyrgyzystandan, Gazagystandan, Özbegistandan, Türkmenistandan we Belarus Respublikasyndan hem-de Russiýa Federasiýasynyň 32 sebitinden 220 golaý wekiller gatnaşdy. Günüň ikinji ýarymda “Mümkinçilikleri giňeltmek: Şahsyýeti ösdürýän bilim gurşawynda saglyk we abadançylyk üçin bilim” atly mugallymlaryň hünär derejesini ýokarlandyrmak boýunça halkara başlangyjynyň iş maslahatyna gatnaşyldy. Iş maslahatyň netijesinde mugallymlar üçin hünär derejelerini ýokarlandyrmak boýunça onlaýn okuwlary gurnamak we onlaýn sapaklary dürli dillerde türkmen dilinde hem taýýarlamak işleriniň meýilleşdirilýändigi barada aýdyldy. 30-njy oktýabrda Kaliningrad şäheriniň awtonom umumybilim berýän 57-nji orta mekdebiniň okuw otaglarynyň guralyşy we gurnaklaryň, şol sanda mekdepde hereket edýän “Kwantorium” tejribehanalaryň işi bilen tanyşlyk gezelenji guraldy. “Kwantorium” çagalar tehnologiýa parky 2023-nji ýylda Russiýa Federasiýasynyň Bilim ministrliginiň goldawy bilen “Häzirki zaman mekdebi” taslamasynyň çäginde (https://edu.gov.ru/) döredildi. Ol okuwçylaryň ylym, matematika we maglumat sowatlylygy, şeýle hem tankydy we döredijilikli pikirlenişini öz içine alýan döwrebap başarnyklaryny ösdürmek üçin umumy bilimiň mazmunyny giňeltmegi maksat edinýär. “Kwantorium” çagalar tehnologiýa parky umumy bilim edarasynyň bilim gurşawynyň bir bölegi bolup, aşakdakylary üpjün edýär: -“Tebigy ylymlar”, “Matematika we kompýuter ylymlary” we “Tehnologiýa” dersleri boýunça dersleri okatmak; -esasy we orta bilim derejelerinde okuwçylar üçin saýlama dersler; -tebigy ylymlar we tehnologiýa derslerini öwrenmek üçin dersden daşary işler; -tebigy ylymlar we tehnologiýa maksatnamalary boýunça çagalar üçin goşmaça bilim; -okuwçylar üçin dersden daşary işler, şol sanda bäsleşikler, intellektual we döredijilik bäsleşikleri we olimpiadalar; -beýleki bilim edaralaryndan çagalar we mugallymlar üçin bilim ulgamyna degişli çäreleri bilelikde guramak, şeýle hem beýleki umumy bilim edaralaryna goldaw bermek we özara gatnaşygy saklamak. 57-nji orta mekdebinde guralan “Bilimde adam-AI hyzmatdaşlygy: hünär we şahsy ösüş üçin mümkinçilikler” atly umumy (plenar) mejlisine gatnaşyldy. Mejlisde: -“Emeli intellekt döwründe bilim we tehnologiýa”; -“Emeli intellekt adamlaryň we işewürligiň hyzmatynda”; - “Kiberhowpsuzlygy öwrenmek we intellektual tehnologiýalar üçin Milli inženerçilik ylmy-barlag merkezi tarapyndan mekdepler üçin işlenip düzülen emeli aň gurallarynyň tanyşdyrylyşy”; -“Geljege goşant” haýyr-sahawat gaznasy tarapyndan tejribede sanly başarnyklar we ukyplar” atly temalar boýunça çykyşlar diňlenildi. 30-njy oktýabrda günüň ikinji ýarymda “AI bilen döret” atly interaktiw bölümçäniň (seksiýanyň) işine gatnaşyldy. Iş saparyň netijesinde Bilim ulgamynda maglumat tehnologiýalary boýunça Instituty (IITE) hem-de “Geljege goşant goşmak” atly Sberbank haýyr-sahawat gaznasy tarapyndan berilen teklipler: -“Geljege goşant goşmak” atly Sberbank haýyr-sahawat gaznasynyň bilim platformasyndaky emeli aň boýunça okuw materiallaryndan peýdalanmak; -Bilim edaralarynyň mugallymlarynyň hünär derejesini ýokarlandyrmak maksady bilen “Mümkinçilikleri giňeltmek: Şahsyýeti ösdürýän bilim gurşawynda saglyk we abadançylyk üçin bilim” atly halkara başlangyjynyň ýol kartasyna goşulmak. Bu halkara başlangyjynyň maksady okuwçylaryň ösüşi, saglygy we abadançylygy üçin şahsy höweslendiriji bilim gurşawyny, sosial-emosional ösüşi we sagdyn durmuş ýörelgesini döretmek üçin gurallary işläp düzmek we wagyz etmek maksady bilen bilim guramalarynyň arasynda halkara hyzmatdaşlygyny höweslendirmek; -Bilim edaralarynyň mugallymlaryna EduHub (https://eduhub.pro/) platformasyndaky halkara sertifikatly okuwlaryna gatnaşmak. Esasan orta mekdep mugallymlary, mekdep müdirleri, mekdep psihologlary we ýokary we orta hünär okuw mekdepleriniň pedagogika we psihologiýa kafedralarynyň mugallymlary üçin niýetlenilen. Okuwlar 2025-nji ýylyň 3-nji noýabrynda we 2026-njy ýylyň 2-nji fewralynda meýilleşdirilýär; -Sanly materiallary (wideo sapaklary we gollanmalary) taýýarlamak. Türkmenistanyň Bilim ministrligi Çeşmesi: Türkmenistanyň Bilim ministirligi