Halypa heýkeltaraş halkara baýragyň eýesi boldy

Berkarar döwletiň täze eýýamynyň Galkynyşy döwründe türkmen medeniýetini we sungatyny halkara derejesinde wagyz etmek üçin giň şertler döredilip, goňşy döwletler bilen dost-doganlyk gatnaşyklary barha berkidilýär. Goňşy ýurdumyz Özbegistan Respublikasynda medeni, ylmy we ynsanperwerlik gymmatlyklaryny häzirkizaman galkynyşy ruhunda ilerletmek, halkara dialogyny berkitmek, medeni giňişligiň ösdürilmeginde aýratyn hyzmatlary bitiren görnükli şahsyýetleri «Geljegiň mirasy» halkara baýragy bilen sylaglandy. Baýrak diňe bir öz ýurduň içinde däl-de, eýsem, daşary ýurtlarda hem edebiýat, medeniýet, sungat, ylym, bilim we sanly tehnologiýalar boýunça görnükli şahsyýetleri goldamagy we höweslendirmegi maksat edinýär. Bu halkara baýragy «edebiýat», «medeni miras», «teatr we kino», «saz we tans»,«şekillendiriş we amaly sungaty», «moda we dizaýn» hem-de «ylym, bilim we sanly tehnologiýalar» ýaly ýedi ugur boýunça gowşurylyp, döredijilik we ylmy şahsyýetleriň milli we global gymmatlyklaryň ösmegine goşýan goşandyny höweslendirmäge, şeýle hem medeni we bilim ösüşini ösdürmäge ýardam berýär. 2025-nji ýylyň 15-nji noýabrynda Özbegistan Respublikasynyň Daşkent şäherinde geçirilen «Geljegiň mirasy» halkara baýragynyň «şekillendiriş we amaly sungaty» ugry boýunça Türkmenistanyň Döwlet çeperçilik akademiýasynyň heýkeltaraşlyk kafedrasynyň uly mugallymy, Türkmenistanyň halk suratkeşi, Türkmenistanyň Hormatly il ýaşulusy, Türkmenistanyň Döwlet çeperçilik akademiýasynyň Hormatly doktory, heýkeltaraş Babasary Annamyradow mynasyp boldy. Türkmenistanyň heýkeltaraşlyk sungatynyň ösmeginde özüniň mynasyp goşandyny goşan Türkmenistanyň halk suratkeşi Babasary Annamyradowdyr. Ol XX asyryň 70-nji ýyllaryndan bäri dünýä we türkmen heýkeltaraşlygynyň naýbaşy däplerini özleşdiren suratkeşdir. Halypa ussadyň döreden monumental we stanok heýkelleri Türkmenistanyň şekillendiriş sungatynyň altyn hazynasyna girdi. Suratkeş bütin ömrüni we zehinini türkmen halkyna hem-de Watanyna bagyş edipdir. Türkmen halkynyň taryhynda uly yz galdyran beýik şahsyýetleriň keşpleri, sungat we medeniýet işgärleriniň portretleri, dünýä sungatynyň äheňleri, filosofik garaýyşlary, türkmen halkynyň aň-düşünjesini, häsiýetini, oba durmuşyny şöhlelendirýän taslamalar ynsanperwerlik gymmatlyklaryny, belent ruhubelentligi şöhlelendirýär. Ussadyň sungata bolanyhlasy, başarjaňlygy, tutanýerliligi, özünebolan ynamy, türkmen halkyna,Watana bolan söýgüsiýaly häsiýetleri onuňdöredýän eserlerinde synlamakbolýar. Halypa mugallym Türkmenistanyň Döwlet çeperçilik akademiýasynyň heýkeltaraşlyk hünäri boýunça bilim alýan talyp ýaşlaryna geçirip, halypa-şägirtlik ýörelgesi esasynda durmuş tejribesini geçirýär. Watanymyzyň dürli künjeklerinde dikeldilen monumental heýkelleri bilen bir hatarda heýkeltaraş çuň mazmunly, taslama gurluşy boýunça täsin, milli duýgyda döredilen kiçi göwrümli eserleriň ussadydyr. Suratkeşiň grafika işlerinde bolsa, heýkellerdäki keşpleriň we filosofik pikirleriň şöhlelenmesi dowam edip, onuň döredijiliginiň özboluşly tarapyny açýar. Babasary Annamyradow Aşgabat şäherindäki Milli Garaşsyzlyk seýilgähinde oturdylan monumental heýkel eserlerine ýolbaşçylyk edip, Bitaraplyk binasyndaky, «Halk hakydasy» ýadygärlikler toplumyndaky, Ylham seýilgähindäki dürli heýkel eserleri döretmekde işjeň gatnaşýar we şu günki-günüň türkmen monumental heýkeltaraşlyk sungatynyň täze öwüşginler bilen baýlaşdyrmaga uly goşant goşýar. Bu heýkeller ýaşlar üçin nusgalyk sungat eserleri bolup galjakdygy şübhesizdir. Olarda taryhy wakalaryň we şahsyýetleriň şöhlelenmesi çeper taýdan beýan edilip, geljek nesillerimize taryhymyzyñ ýadygärlik görnüşinde galdyrylmagynyñ nusgasydyr. Babasary Annamyradowyň şahsy galereýasynda saklanylýan şekillendiriş we amaly-haşam sungatyna degişli bolan eserleri türkmen sungatynyň naýbaşy eserleri geljekki nesillere ýetirmäge, olary ylmy taýdan öwrenmäge mümkinçilik berýär. Halypa heýkeltaraşyň öndürijilikli zähmeti oňa döwlet we halkara derejesindäki baýraklara, sylaglara mynasyp bolmagyna getirýär. Halkara parahatçylyk we ynanyşmak ýylynda Türkmenistanyň halk suratkeşi Babasary Annamyradowa Özbegistan Respublikasynyň Daşkent şäherinde geçirilen «Geljegiň mirasy» halkara baýragynyň gowşurylmagy özbek-türkmen medeni gatnaşyklarynyň barha pugtalandyrylýandygyny alamatlandyrýar. Jeren Baltaýewa, Türkmenistanyň Döwlet çeperçilik akademiýasynyň sungaty öwreniş kafedrasynyň mugallymy.