Öňdebaryjy dünýä tejribesini özleşdirip
Soňky ýyllarda daşary ýurtlaryň iri bilim we ylym merkezleri bilen hyzmatdaşlyk täze derejä çykdy. Bu ugurda netijeli hyzmatdaşlygy ösdürmek, talyplaryň we mugallymlaryň özara tejribe alyşmak meseleleri hormatly Prezidentimiziň daşary ýurtlara amala aşyrýan saparlarynyň gün tertibine yzygiderli girizilýär. Gazanylýan ylalaşyklaryň netijesinde hyzmatdaş ýurtlaryň sany barha artýar. Olaryň arasynda Amerikanyň Birleşen Ştatlary hem bar. Golaýda Türkmenistanyň bilim ulgamynyň wekillerinden düzülen toparyň ABŞ-nyň Montana hem-de Waýoming ştatlarynda bolmagy ýurdumyzda iň gowy dünýä tejribesiniň öwrenilmegine, ylym we bilim ulgamynda daşary ýurtly hyzmatdaşlar bilen netijeli gatnaşyklaryň ösdürilmegine uly ähmiýet berilýändiginiň nobatdaky subutnamasy boldy. Bu wakanyň hormatly Prezidentimiziň ABŞ-a iş saparynyň öňüsyrasynda bolmagy bizi has-da buýsandyrdy. Saparyň dowamynda Demirgazyk-Günbatar kollejinde, Montana uniwersitetinde, Montana döwlet uniwersitetinde, Waýoming we Kraç uniwersitetlerinde, olaryň Billings, Mizula, Bozman, Lorami şäherlerinde ýerleşýän okuw mekdeplerinde okuw-usuly işleriň guralyşy, okuw işinde sanly tehnologiýalardan peýdalanylyşy, talyplary ylmy-barlag işlerine ugrukdyrmak boýunça alnyp barylýan işler bilen tanşyldy. Waýoming ştatynyň Pawell şäherinde ýerleşýän Demirgazyk-Günbatar kollejinde okaýan türkmenistanly talyplar bilen geçirilen duşuşyk has-da täsirli boldy. Gahryman Arkadagymyzyň, Arkadagly Gahryman Serdarymyzyň döredýän giň mümkinçiliklerinden peýdalanyp, amerikan kollejinde bilim alýan türkmen ýaşlary özleriniň ýiti zehini, guramaçylyk ukyplary bilen göreldeli talyplaryň hatarynda tanalýarlar. Kollejde Türkmenistanyň Bitaraplyk hukuk derejesine eýe bolmagynyň şanly 30 ýyllygy mynasybetli geçirilen çärä gatnaşan myhmanlara türkmen Bitaraplygynyň taryhy kökleri, sebitde we dünýäde parahatçylygy, howpsuzlygy üpjün etmekde onuň ähmiýeti we bu ugurda ýetilen sepgitler hakynda gürrüň berildi. Gurbangeldi MUHAMMEDOW, Seýitnazar Seýdi adyndaky Türkmen döwlet mugallymçylyk institutynyň rektory.