Türkmen Bitaraplygynyň belent waspy

Hemişelik Bitaraplygymyzyň 30 ýyllygynyň halkara derejede giňden bellenilen günlerinde Arkadagly Gahryman Serdarymyzyň «Türkmenistanyň Bitaraplygy — parahatçylygyň we ynanyşmagyň aýdyň ýoly» atly kitaby okyjylara gowuşdy. Bu ajaýyp eserde halkymyzyň şöhratly taryhy, durmuş ýörelgesi, ruhy pelsepesi we rowaç şu güni beýan edilýär. Bitaraplygyň taryhy ideologiýasynyň emele gelşi seljerilýär. «Türkmen halky üçin Bitaraplyk biziň taryhymyzyň, medeniýetimiziň, ruhumyzyň we milli häsiýetimiziň tebigy dowamydyr» diýip, hormatly Prezidentimiz belleýär. Kitabyň birinji bölümi «Bitaraplyk — türkmen paýhasynda» diýlip atlandyrylyp, onda Bitaraplyk, ata-babalarymyzyň adamzadyň medeni ösüşine goşan saldamly goşandy, guran we dünýä ýaň salan döwletleri barada söhbet açylýar. «Oguznama», «Gorkut ata», «Görogly» eposlarynda, Azady, Andalyp, Magtymguly ýaly şahyrlaryň döredijiliginde waspy ýetirilýän myhmansöýerlik, uly-kiçini hormatlamak, raýdaşlyk, pespällik ýaly milli häsiýetleriň oňyn Bitaraplyk ýörelgelerine doly laýyk gelýändigi delillendirilýär. Halkymyzyň maslahatlaşmak, geňeş etmek ýaly däp-dessurlary bu gün Ýer ýüzünde «türkmen Bitaraplygy» diýen belent ada eýe bolan hemişelik Bitaraplyk hukuk ýagdaýynyň hut şol asylly däplerden we häsiýetlerden kemal tapandygy uly buýsanç bilen nygtalýar. Bike DIWANGULYÝEWA, Magtymguly adyndaky Türkmen döwlet uniwersitetiniň ÝUNESKO kafedrasynyň müdiri, taryh ylymlarynyň doktory.